МААЛЫМАТ ПОРТАЛЫ

Р. Момбеков: “Корумду-Балбай жолу эки эсе кымбат бааланды”

14.07.2021

Жогорку Кеңештин депутаты Рыскелди Момбеков Корумду — Балбай жолунун курулушу эки эсе кымбат бааланып жатканын билдирди.

Эл өкүлү 104 чакырымдык Балыкчы — Корумду жолун 6,8 миллиард сомго кымбат курган деп айыптап, ошондой эле премьер-министр Темир Сариев, транспорт министри Аргынбек Малабаев кызматтан кеткенин айтып, бул долбоор андан эки эсе кымбатка түшкөнүн билдирди.

“Депутаттык комиссия түзүп, кымбат болуп кетти деп Сариев менен Малабаевди кетиргенбиз. Азыр эки эсе кымбат салып жатабыз. Анда тигилерди кайра алып келиш керек. Бул долбоордо Чолпон-Атадай шаарды кесип өтпөйт, Долинкадагыдай коммуникацияларды кылбайт. Аралыктары алыс, бирок эки эсе кымбат. Кредиттин пайыздык коюму да жогору. Жол салуу эмес эле казынага кол салуу болуп жатпайбы. Эки жолго эки баа, 65 миллион доллар жана 135 миллион доллар. Бирок категориялары бирдей”, — деди Момбеков.

Балыкчы — Корумду жолун бюджеттин эсебинен салыктардын баары төлөнүп курулганын, мында кредитке, салык төлөбөй салууга белсенип жатышканын сындады.

Транспорт жана коммуникация министринин орун басары Нурланбек Кайынбаев бул долбоорго жаңы критерийлер кошулганын айтты.

“Мурда төрт тилкелүү болгондо ортосуна тосмо коюлчу эмес, азыр Корумду — Балбай жолуна тосмо орнотулат. Андан сырткары, 81 чакырымы тротуар, веложол, жарыктандыруусу менен жасалат. Бул сметалык баасы, тендер өткөндөн кийин баасы түшөт. Балыкчы — Корумду жолунун курулушу боюнча тендер 6 жыл мурун өткөн да. Мында веложол менен тротуардун кенендиги төрт метр болот”, — деди Кайынбаев.

Балыкчы — Корумду унаа жолунун курулушунун жалпы наркы 128 миллион долларды түзөт. Каражат чет өлкөдөн насыя катары алынат.

Share on facebook
Share on twitter
Share on whatsapp
Share on vk
Share on odnoklassniki
Share on telegram