МААЛЫМАТ ПОРТАЛЫ

Айзада Канатбекова зордукталгандан кийин өлтүрүлгөн

04.05.2021

Бишкекте уурдалган Айзада Канатбекова киши колдуу болгонго чейин зордукталганы аныкталды. Бул тууралуу ондогон журналисттерге маркумдун жакындарынын адвокаты Нурбек Токтакунов билдирди.

“Бишкек шаардык милициясы Айзаданын өлүмүнө байланыштуу кылмыш ишин тергеп бүтүп, сотко жөнөттү. Анда Замирбек Теңизбаевге “адам уурдоо, өлтүрүү жана зордуктоо” беренелери менен айып коюлду. Ишти иликтөөдө маркум зордукталганы аныкталды. Айзада каршылык көрсөткөн. Экспертизада анын буту-колдору тытылганы, көгөргөнү аныкталды”, -деди Токтакунов.

Адвокат милиция ишти шашылыш тергеп сотко жөнөткөнүн, анда кайсы бир жагдайлар, маселен Айзада үзүлгөн убакыт аныкталбай калганын, ошондой эле милиция маркумду ыкчам, баарылап издегени тууралуу жасалма документтерди сотко жөнөткөн материалдарга тиркеп койгонун белгиледи.

Бишкек шаардык ички иштер башкы башкармалыгы мындай дооматтарга азырынча комментарий бере элек.

Айзаданы 5-апрелде Бишкекте үч адам күчтөп машинеге салып кеткен. Эки күндөн кийин кыздын жана аны уурдаган эркектин сөөгү талаадан табылган.

Шаардык милиция адам уурдоого шектүү, 36 жаштагы Замирбек Теңизбаев алгач кызды футболка менен муунтуп өлтүрүп, андан кийин өзүнүн күрөө тамырын кыйганын билдирген.
fakt.kg

Share on facebook
Share on twitter
Share on whatsapp
Share on vk
Share on odnoklassniki
Share on telegram