Урмат Самаев: «Чүй райондук жана Токмок аймактык ооруканасына капиталдык ремонт жасоо зарыл»

29

Бүгүн, 6-декабрда Жогорку Кеңештин жыйынында депутат Урмат Самаев Чүй райондук жана Токмок аймактык ооруканасына байланыштуу маселеге токтолду.

1967-жылдан бери иштеп келген Чүй райондук ооруканасы 60 миңге жакын калкты тейлегенин баса белгилеп, аймактык оорукана Токмок шаарына, Кемин, Ысык-Ата районуна жана коңшу Казакстандын Кыргызстанга жакын жайгашкан аймагына жардам көрсөтөөрүн кошумчалады. “Оорукананын инфекциялык бөлүмү 1998-жылдан бери иштебей келет. Имараттын абалы өтө начар болгондуктан, капиталдык ремонт жасоого муктаж. Андан сырткары, оорукананын жүк ташуучу лифти 1987-жылдан бери иштебейт. Операциялык блок 3-кабатта жайгашкандыктан, оорулууларды кабаттан-кабатка замбил менен көтөрүп которууга туура келип, кызматкерлерге кыйынчылык жаралууда. Ошондой эле Токмок аймактык ооруканасына да капиталдык ремонт жасоо зарыл. 2012-жылы салынганына 100 жыл болгон оорукананын эскилиги жетип, абдан начар абалда” – деген эл өкүлү Өкмөттүн Жогорку Кеңештеги өкүлүнө кайрылып, 2019-жылдын республикалык бюджетине Чүй райондук жана Токмок аймактык ооруканасына капиталдык ремонт жасоону киргизүү керек экендигин айтты.

fakt.kg